රජයෙන් විශේෂ නිවේදන කිහිපයක්.

හෙට(06) සිට අප්‍රේල් 10 සිකුරාදා දක්වා සතියේ වැඩකරන දින රාජ්‍ය, පෞද්ගලික දෙඅංශයේම ආයතන සඳහා නිවසේ සිට වැඩකරන කාලයක් ලෙස ප්‍රකාශයට පත් කර ඇත.

මීට කළින් සතියද නිවසේ සිට වැඩකරන කාලයක් ලෙස නම් කර තිබිණ.

කොරෝනා වෛරස ව්‍යාප්තිය සලකන විට ඉහළ අවදානමක් සහිත කලාප ලෙස හඳුනා ගෙන ඇති කොළඹ, ගම්පහ, කළුතර, පුත්තලම, මහනුවර සහ යාපනය දිස්ත්‍රික්කවල දැන් ක්‍රියාත්මක ඇඳිරි නීතිය නැවත දන්වනතුරු දිගටම බලාත්මකව පවතින බවද ජනාධිපති මාධ්‍ය අංශය නිවේදනය කරයි.

සෙසු සියලූ දිස්ත්‍රික්කවල ක්‍රියාත්මක වූ ඇඳිරි නීතිය හෙට උදේ 6.00ට ලිහිල් කෙරෙන අතර, එදිනම  දහවල් 2.00 සිට යළි පනවනු ලැබේ.

දැඩි අවධානම් දිස්ත්‍රික්කවලට  පැනවෙන ඇඳිරි නීතිය ඉවත් කිරීම සම්බන්ධව පසුව දැනුම් දෙනු ලැබේ.

අත්‍යාවශ්‍ය සේවා හැර වෙනත් කාර්යයන් සඳහා දිස්ත්‍රික්ක අතර ගමනාගමනය සම්පූර්ණයෙන්ම තහනම් කර තිබේ.

අත්‍යාවශ්‍ය සේවා කාර්යක්ෂමව පවත්වාගෙන යනු පිණිස යොදා ඇති ක්‍රමවේද අවභාවිත කරන පිරිසට එරෙහිව නීතිය තදින්ම ක්‍රියාත්මක කිරීමට ආරක්ෂක අංශ කටයුතු කරනු ලැබේ.

ඇඳිරි නීතිය බලපැවැත්වෙන කාලය තුළ ජනතාවට අත්‍යාවශ්‍ය ආහාර ද්‍රව්‍ය සහ වෙනත් භාණ්ඩ නිවසේ සිටම මිලදී ගත හැකි වන පරිදි නොකඩවා සැපයීමට රජය සියලු විධිවිධාන සලසා ඇත.

කවර දිස්ත්‍රික්කයක වුවද ගොවිතැන් වැඩ කරන සහ කුඩා තේවතු හා අපනයන භෝග නිෂ්පාදන ක්‍රියාවලියේ නිරත ජනතාවට එකී වැඩ කිරීමට අවසර ඇත.

කොරෝනා වෛරසය ව්‍යාප්තිය නතර කිරීමට ඉවහල් වන ක්‍රියාමාර්ග ගෙන ඇත්තේ හුදෙක් ජනතාවගේ සුභ සිද්ධිය උදෙසා බැවින් එකී ක්‍රියාමාර්ග සහ උපදෙස් වගකීමෙන් පිළිපදින ලෙස රජය ජනතාවගෙන් ඉල්ලා සිටී.

කොළඹ, කළුතර සහ මහනුවර දිස්ත්‍රික්කවල හුදකලා ප්‍රදේශ ලෙස නම් කර ඇති ගම්මාන හුදකලා ප්‍රදේශ ලෙස තවදුරටත් සලකනු ලැබේ.

කවරකුට හෝ මේ ගම්මානවලට ඇතුළුවීම හෝ ඉන් පිටවීම හෝ නැවත දැනුම් දෙන තුරු සම්පූර්ණයෙන් තහනම් වන බවත් ජනාධිපති මාධ්‍ය අංශය නිවේදනය කරයි.

මෙම අවස්ථාවේ ඇඳිරිනීතිය කඩමින් සහ කල්ලි ගැසෙමින් හැසිරෙන පිරිස පිළිබඳ දැඩිව නීතිය ක්‍රියාත්මක කරන අතර වරෙන්තු නොමැතිව අත්අඩංගුවට ගනු ලැබේ

මෙම උපදෙස් අකුරට පිළිපදිමින් නිවෙසට වී කාලය ගතකොට කොරෝනා ශ්‍රි ලංකාවෙන් මැඩලීමේ කටයුතු වෙනුවෙන් දායකවනලෙස රජය වැඩිදුරටත් ජනතාවට දන්වයි.

රෝග ලක්ෂණ මතුවේනම් කිසිදු බියකින් තොරව රෝහල් ගත්ව වෛද්‍ය ප්‍රතිකාර ලබාගන්නා ලෙසත් රෝගය වසන් කොට සමාජයේ පැතිරීම වර්ධනය නොකරන ලෙසත් සෞඛ්‍ය බලධාරීන් ජනතාවගෙන් ඉල්ලීමක් කරයි