කොවිඩ්-19 මර්දන එන්නත ලබා ගැනීමට පෙර සහ එන්නත ලබා ගැනීමෙන් පසු මේ පිළිබඳ සැලකිලිමත් වන්න

කොවිඩ් මර්දන එන්නත ලබා ගැනීමට පෙර සහ එම එන්නත ලබා ගැනීමෙන් පසු ජනතාව සැලකිලිමත් විය යුතු කරුණු කිහිපයක් සෞඛ්‍ය අමාත්‍යාංශයේ ආපදා පෙර සූදානම් සහ හදිසි ප්‍රතිචාර ඒකක නිවේදනය කළා. එම ඒකකය වෙනුවෙන් එහි අංශ ප්‍රධානී මෙන් ම සෞඛ්‍ය අමාත්‍යංශයේ අධ්‍යාපන පුහුණු සහ පර්යේෂණ ඒකකයේ වැඩ බලන නියෝජ්‍ය අධ්‍යක්ෂ, විශේෂඥ වෛද්‍ය හේමන්ත හේරත් මහතා මෙම කරුණු ප්‍රකාශයට පත් කළා.

ඒ අනුව, එන්නත ලබාගත් සහ ලබාගැනීමට බලාපොරොත්තුවන ඔබ, පහත සඳහන් කරුණු කෙරෙහි අවධානය යොමුකළ යුතු වනවා.

  • එන්නත ලබා ගැනීමට පෙර තමාට ඇති රෝග සම්බන්ධයෙන්, එන්නත ලබාදෙන ස්ථානයේ සිටින වෛද්‍යවරයා දැනුවත්කොට අවශ්‍ය උපදෙස් ලබා ගත යුතුය.
  • එන්නත ලබා ගැනීමෙන් පසු දින තුනක්වත් ගතවන තෙක් අනවශ්‍ය ලෙස වෙහෙස නොවිය යුතුය.
  • සාමාන්‍ය උණ තත්ත්වයක් පවතී නම් පැරසිටමෝල් පෙති දෙකක් ලබා ගන්න.
  • පැය 48කට වඩා උණ පවතී නම් වෛද්‍ය ප්‍රතිකාර ලබා ගන්න.
  • එන්නත ලබා ගැනීමෙන් පසු වෙනත් රෝග සංකූලතා ඇති වේ නම් වෛද්‍යවරයකු හමුවන්න.
  • උණ තත්ත්වයක් නොමැති නම් ස්නානය කිරීම ගැටලුවක් නොමැත.
  • නිදන්ගත රෝග ඇති පුද්ගලයන් ඇත්නම් අවශ්‍ය බෙහෙත් නිසි වේලාවට ලබා ගන්න.
  • එන්නත ලබා ගැනීමට පෙර සහ පසු ගනු ලබන ආහාර පිළිබඳ විශේෂයක් නොමැති අතර තමාගේ සාමාන්‍ය ආහාර වේල ලබා ගන්න.
  • සෑම විටම මුඛ ආවරණ පළඳින්න. සෞඛ්‍ය නීති රීති අනුගමනය කරන්න.
  • දෙවන මාත්‍රාව ලබා ගැනීම සඳහා එන්නත ලබාගත් ස්ථානයෙන් ලබා දුන් කාඩ්පත සුරැකිව තබා ගන්න.