මුහුණු ආවරණ සහිත ඇඳුම් සහ හිස් ආවරණ ගැන ඇමති අකිලගෙන් පාසල්වලට ලියියක්.

මුහුණු ආවරණය සහිත ඇඳුම් හා ආරක්ෂිත හිස් ආවරණ පිළිබඳව දැනුම්වත් කිරීම සඳහා පාසල් ප්‍රධානීන්ට ලිපියක් යොමු කිරීමට අධ්‍යාපන අමාත්‍ය අකිල විරාජ් කාරියවසම් මහතා කටයුතු කර තිබේ.

මුහුණු ආවරණය සම්බන්ධයෙන් හදිසි නීති රෙගුලාසි යටතේ පනවා ඇති විධිවිධාන පිළිබඳ නොදැනුවත්කම නිසා මුහුණු ආවරණය කර ගෙන ඇතැම් පුද්ගලයින් පාසලට පැමිණීම මෙන්ම සහ සමහර ගුරුවරියන් ද මුහුණු ආවරණ සහිත ඇඳුමෙන් සැරසී පාසලට පැමිණීම ද හේතුවෙන් පසුගිය දිනවල පාසල් කිහිපයක ගැටලු සහගත තත්ත්වයක් ඇති විය.

මෙම තත්ත්වය සම්බන්ධයෙන් දැඩි අවධානය යොමු කළ අධ්‍යාපන අමාත්‍ය අකිල විරාජ් කාරියවසම් මහතා මෙම ලිපිය යොමු කර තිබේ.

එවැනි සිද්ධියක දී පාසල් ප්‍රධානීන් මැදිහත් වියයුතු ආකාරය සහ පාසල්වලට ඇතුල්වීමේ දී මුහුණු ආවරණ සහිත ඇඳුම් හා ආරක්ෂක හිස් ආවරණ පැළැඳීම සම්බන්ධයෙන් නියෝග ද මෙම ලිපියෙහි සඳහන් වේ.

පූර්ණ මුහුණු ආවරණ සම්බන්ධව හදිසි නීති රෙගුලාසි යටතේ නිකුත් කර ඇති රජයේ අති විශේෂ ගැසට් නිවේදනයන් හි දැක්වෙන නියෝගයට අනුකූලව සහ මානව හිමිකම් කොමිෂන් සභාව මුහුණු ආවරණය පිළිබඳව අධ්‍යාපන අමාත්‍යාංශයට යොමු කර ඇති චිත්‍රණයක් ද සහිතව අධ්‍යාපන අමාත්‍යවරයාගේ උපදෙස් පරිදි එම විශේෂ ලිපිය අධ්‍යාපන ලේකම්වරයා පාසල් ප්‍රධානීන්ට යොමු කොට තිබේ.

මෙරට ජනතාවගේ අනන්‍යතාව තහවුරු කිරීමට බාධාවක් වන ලෙස මුහුණු ආවරණය කිරීම අප්‍රේල් මස 29 වන දින සිට තහනම් කිරීමට ජනාධිපති මෛත්‍රීපාල සිරිසේන මහතා පියවර ගෙන ගත්තේ ත්‍රස්තවාදී ප්‍රහාරය හේතුකොට ගනිමින් ය.

කෙසේවෙතත් බුර්කාව සහ නිකාබය මෙම නීතිය යටතේ තහනම් අතර සම්පූර්ණයෙන්ම මුහුණ වසාගත් හෙල්මට් පැළඳීමද තහනමට ලක්විය.

Close Menu