පැරණි පාර්ලිමේන්තුව නැරඹීමට ජනතාවට අවස්ථාව හිමිවෙයි.

මාර්තු 14 සෙනසුරාදා සිට සෑම සති අන්තයකම පෙ.ව 10.00 සිට ප.ව 4.00 දක්වා පැරණි පාර්ලිමේන්තුව හෙවත් වර්තමාන ජනාධිපති කාර්යාලය නැරඹීමේ අවස්ථාව මහජනතාවට හිමි වෙයි. නැරඹීමට එන අයට ඡායාරූප ගැනීමට ද අවස්ථාව හිමිවෙයි.

011-2441685 ෆැක්ස් අංකයට ලිපියක් යොමු කිරීමෙන් හෝ අංක 011-2354354 ඇමතීමෙන් මේ සඳහා  වේලාව වෙන්කර ගත හැකිය.
පැරණි පාර්ලිමේන්තු ගොඩනැඟිල්ල ශ්‍රී ලාංකේය දේශපාලන ඉතිහාසයේ තීරණාත්මක යුගයක් නියෝජනය කරයි. පැරණි ගෘහ නිර්මාණ ශෛලීන් පහෙන් එකක් වන “ අයෝනියානු ශෛලිය” ට අනුව වසර 82 කට පෙර මෙය  නිර්මාණය කර තිබේ. එය බාහිර පෙනුමින් ඇතෑන්ස් හි ඇක්‍රොපොලීස් කඳු මුදුනේ “ඇතීනා” නම් ග්‍රීක දෙවඟන වෙනුවෙන් ඉදිකොට ඇති ප්‍රධාන දෙව්මැදුර වන “ පාතිනන්” ගොඩනැගිල්ලට සමානත්වයක් උසුලයි.
ශ්‍රීමත් හර්බට් ස්ටැන්ලි ආණ්ඩුකාරවරයා විසින්1930 ජනවාරි මස 29 වැනි දින ව්‍යවස්ථාදායක සභාව ලෙස  ගොඩනැගිල්ල ස්ථාපනය කර ඇත. ව්‍යවස්ථා ප්‍රතිසංස්කරණ සහ ව්‍යවස්ථාදායකයේ පසුව සිදු වූ නාම සංශෝධන සමඟ මෙය රාජ්‍ය මන්ත්‍රණ සභාව (1931–1947) නියෝජිත මන්ත්‍රී මණ්ඩලය (1947-1972) ජාතික රාජ්‍ය සභාව (1972-1978) සහ ශ්‍රී ලංකා පාර්ලිමේන්තුව (1978-1982) යන නම්වලින් හඳුන්වනු ලැබීය.  පාර්ලිමේන්තුව ශ්‍රි ජයවර්ධනපුර කෝට්ටේ වෙත ගෙන යාමෙන් පසුව මේ පෞරාණික ගොඩනැගිල්ල 1983 සැප්තැම්බර් මස 8 වැනි දින ජනාධිපති කාර්යාලය ලෙස නම් කෙරිණ.
මේ පිළිබඳ නිවේදනයක් ජනාධිපති ගෝඨාභය රාජපක්ෂ මහතාගේ නිල ෆේස් බුක් පිටුවෙහි සඳහන් ය.

Close Menu